وانا في سوق شوفوا وش حصل

[ضحكتي دمعه]

السلام عليكم ورحمة الله وبركاته

بدخل في الموضوع على طول

ذهبت للسوق وبعد ما خلصت التسوق رحت قسم الالعاب والمطاعم وكنت ابحث عن مكان اجلس فيه حصلت حرمه جالسه في طاوله لوحدها وجنبها كراسي قلت لها ممكن كراسي قالت اجلسي انا لو حدي جالسه وكانت الحرمه عينها على ورقه مو راضيه تلتفت لا يمين ولا يسار جلسة جنبها وجلسة اطفالي امامي من باب الفضول عيني تناظر في ورقه عارفين وش تقره صك طلاقها انا انفجعت حسبة تقره ورقه عن دورات ولا مشغل

معد قدرت اتحمل قلت لها الصك ليكي ناظرة فيا عيونها تبغى تنزل الدمعه قالت ايه تطلقت اليوم قلت لها ليش وباين عليها عمرها يعني في نهاية 30

قالت كنت مره مشجعه التعدد تقول جوني ناس عزاب قلت ابغى معدد وجاني هذا تقول مزوج ومعاه اولاد وبنات كبار ونفسه يتزوج ووافقت وفرحانه وطايره من الفرحه وقال لابوي زوجتي موافقه وتم الزواج تقول جلسة معاه بس شهر وبعدين اتصل عليها تقول وانا في بيته جالسه يقولها خلاص طلقتك روحي كلمي ابوكي يا خذك قالت ليه وش سويت لك حرام عليك ابيك قالها زوجتي الاولى وبناتي قالوا تطلقها ولانترك البيت كلنا وما اقدر اخرب حياتي عشانك الله بيرزقك احسن مني

بصراحه معد عرفت وش اقولها جالسه اناظر فيها عن جد قهر بس كثير رجال مثله على فكره انا كنت ابغى تعدد لما شفت هاذي وربي حسيت ابغي ابكي حتى معد ليا رغبه اكل قمت وقلت لها الله يعوضك خير

[ناصر الثبيتي]

للأسف الشديد بعض الناس مايخاف الله في بنات الناس يطلقهم متى ماحصل له مشاكل وهذه امر مؤسف نلاحظه في المعددين

[ريااانه]

الله يعوضها خير ..
و زوجها اذا هو على كلامها " بيلقى جزاه "

[ابومالك]

هذا تنطبق عليه الآيه وهي قوله تعالى ( فإن خفتم ألا تعدلوا فواحدة )
من خاف من زوجته الاولى فلايجوز له ان يعدد ويجرب وبنات الناس ليسوا لعبة

[عزوبي يبي الحلال]

لا حول ولا قوه إلى هالدرجه اللعب بالمشاعر...

[قمة السعادة]

حسبي الله ونعم الوكيل اللهم اجرها في مصيبتها وخلف لها خير منه (هذا للاسف مو رجال هذا من أشباه الرجال ) بس نفسي أعرف الناس اللي زي كذا كيف تقدر تحط راسها على المخدة وتنام يارب لا تبلانا بقلوب زي الحجر

[صوت المطر]

هناكـ .. حكاية من المؤلم البوح بها
حروف .. تتساقط دموعاً قبل كتابتها

هناكـ .. الكثير .. والكثير

مما يقبع في حنايا كل روح ..
وليست كل روحٍ .. بمقدورها أن تبوح ..

فـ كيف لي أن أكسر ذلكـ الحاجز ..
حاجز الصمت .. والقلب الكتوم ..



ودي اشكي واخاف ابكي لو تكلمت وشكيت

,,

عبارة قد داعبت وجداني
(لسنا بحاجة لـ آشباة رجال في حياتنا)

مضمـون يستحق عنــاء البحث..

مجرد التفكير بالرجل المعدد يترتب اولويات يجب ان لانتجاهلها ..

إلا القلوب ..
المشاعـر ..
الأحاسيس ..


بربكم !! توقفوا كثيراً قبل الإقتراب منها ..


فلا رحمّ الله إمرءٍ عبث بها ..!!

[الراشد]

يا ما مر علي من القصص تدمي الكبد لا وبعض الأزواج

يتسبب في انتحار كثير من النساء

والله اتصل بي الكثير من النساء يقولون ماحكم الانتحار

بداية حياتهم بأزواج مدمرين مثل هؤلاء

حرام من لعب ببنات المسلمين

[دموع البنفسج]

حسبي الله ونعم الوكيل.

مثلما تدين تدان...

ألي سواه في بنات الناس.. ربي رح يسلط ناس يسوون نفس الشئ في بناته...

ربي يصبرهاا ... ويعوضهاا خير..

دمتي بخير غلااتي

[مرهف الاحساس]

الله يا الدنيا
اي واحد مايفكر في الاخره مايهمه شيئ والبنت مسكينه والله تكسر الخاطر يعني يحمد ربه متزوج وابوعيال وعياله كبار وافقت عليه ومتمسكه فيه بعد
لاحول ولاقوة الا بالله

[برايفت]

كثير مايخافو الله ><

[الملقوفة]

حسبي الله ونعم الوكيل
اذا كان خايف ومو قد المسئوليه ليش يتزوج ؟؟!!
الله يعوضها ويرزقها باللي احسن منه وان شاء الله عازب مالت عليه ذا الشايب:aaa105:

[بنت القرية]

الله يعوضها خير.
أنا أخوي تزوج على الأولى , قالت له : تطلقها ولا أترك البيت ؟
قال ما راح أطلقها لو أيش.
قعدت ما عرفت شو تسوي يوم عرفت إن أخوي ما عليه.